Албохчанаькъан Зейнапа хетабаь гойтам хьабийллар къаман библиотеке
Литературе лоархӀаме моттиг дӀалаьца хьайоагӀача вай къаман литератора, Албохчанаькъан Зейнапа хетабаь гойтам ба къаман библиотеке дӀахьош. Къаман йоазонхой лоархӀарий аьттув ба, Зейнапа литератураца йолаш хьабена никъ бовза, цун книжкаш деша.
«ГӀалгӀай къаман йоазонхой Союза, Россе йоазонхой Союза доакъашхо я Зейнап. Прозаца, поэзеца, драматургеца къахьегаш хьайоагӀа йоазонхо.
2009-ча шера къаман библиотеко арахийцар цун «Дуненна сердал лур» яха гуллам. Иштта цо арахийцаб берашта лаьрхӀача дувцарех латта «Безама низ» яха гуллам.
«Литературни ГӀалгӀайче», «СелаӀад» яхача журналаш тӀа кепа йийттай цун йоазошта. «Баьца тӀа тхир» яхача юкъарча гулламца да цун цхьадола балхаш, иштта къаман библиотеко арахийцача «ГӀалгӀай байтий антологи» яхача кхаь книжканна, «Ингушская лира» яхача байтех латтача антологена юкъедихьар къаман литературе хьинаре къахьегаш хьайоагӀача Албохчанаькъан Зейнапа йоазош», - дийцар «Сердалога» къаман библиотеке.
Белгалде деза, республикерча керттерча библиотеко къаман авторий кхолламашта лакха терко лоаттаелга. 20 шу совгӀа ха я укхаза «Поэзен библиотека» яха проект болх беш йола. Цу оагӀоно вайна йовзийт къаман кердача йоазонхой цӀераш.
