Из ди белгалдоаккхаш, Янданаькъан Хамарзий Жамалда цӀерагӀча ГӀалгӀайчен къаман библиотекан болхлоша, «Дешархошта культура» яхача Ерригроссе боахамашта юкъерча дешара проекта чуйоагӀаш, Шолжерча №1 йолча юкъерча ишколе, хьехархочунца Шадажанаькъан П. цхьана экскурси дӀайихьар. Къаман библиотекан литература лорадара йолча отдела кулгалхо Шаденаькъан Лизас берашта дӀабовзийтар шоаш беш бола болх. Къонача дешархой аьттув баьлар, арадувлаш дола книжкаш мишта лораду, мичахьа леладу ха, иштта библиотекерча берий книжкаех лаьца а дукха кердадараш дайзар царна, цул совгӀа, царна бовзийтар библиотекан болхлой хӀара деннара болх.

Экскурси дӀахьош, берашта байзар Пушкин А.С. 225 шу дузаш хилара хетабаь книжкай гойтам, иштта дешара зале кийчдаь кхыдола гойтама балхаш», - аьлар «Сердало» газетага ГӀалгӀайчен керттерча библиотекан зарбан болх лелабераша.

Дешархошта дийцар, Пушкина эрсий меттала, литература дегӀадоаладеш доккха дакъа юкъе дена хиларах, дуненна литература даькъ тӀа цо ший моттиг хьалаьца хиларах. Бераша боккхача теркамца ладийгӀар поэта бер долаш а кхувш воагӀаш а хиннача вахара исторега, цун валарах лаьца хиннача дувцарга.