Наьсарерча урамий цӏераш гӏалгӏай меттала хургья
Наьсарерча моттигашкара урамий цӏераш гӏалгӏай меттала хургья хӏанзчул тӏехьагӏа. Из хоам «Сердалога» бир шахьара мэре.
«Урамий цӏераш гӏалгӏай метталахувцаш болх дӏабахьа лаьрхӏад оаха. Вай къаман меттацара лерхӏам, ӏадаташ, истори лорадара тӏехьа дӏахьош болх ба из. Кхыча меттала хоам беш дола улгаш хьалдеттар лаьгӏде деза, аьнна, чӏоагӏо яьй бокъонца.
Цунга хьежжа, шахьара моттигашка дукхагӏа вай къаман мотт хила беза. Хӏара къамо ший мотт лархӏа безилга хьагойташ да из гӏулакх. РФ къамий меттай Ди чӏоагӏдар а из белгалдеш да», - аьлар тхога шахьара да волча Оздой Руслана.
Россе Президента Путин Владимира РФ къамий меттай Ди чӏоагӏдеш долча амара кулг яздаьд. Хӏара шера тов бетта 8-ча дийнахьа дездергда из керда цӏай. Урамий цӏераш хувцаш бола болх эггара хьалха керттерча урамашкара дӏаболабергба.
Шахьара дас тӏадилла, цу балха юкъе дакъа лоацаш хургба гӏалгӏай мотт кӏоарга ховш бола хьехархой, ӏилман болхлой, мехктохкам беш бола нах. Дуккха къамаш дахача вай боккхача мехка, меттай кхоане лораяра тӏехьа, лоархӏаме болх ба из.
