Берашта лазараш даржаргдоацаш, маьхий деттара хетаяь кхетаче дӀайихьар мехка
![Берашта лазараш даржаргдоацаш, маьхий деттара хетаяь кхетаче дӀайихьар мехка](http://serdalo.ru/storage/oRvTl5A97lUPwM3a8yzNMabBU5MyRkjwtshg5AGK.jpg)
Берашта ханнахьа маьхий тохара хетаяь кхетаче дӀайихьар, вай республикерча керттерча дарбанче. Цу гӀулакха хьалхаэттар я Роспотребнадзор.
Мехка лазараш даржаш латтар теркаме лаьца, дӀаболабаь болх ба из. Из хоам «Сердалога» бир унахцӀенон гӀулакхех йолча министерствон зарбан болх лелабераша.
Кхетаче къамаьлаш даьраш бар Пирогова цӀерах йолча университета дӀа-юха доалача лазарех йолча кафедра болхлой, полиомиелит яхача вируса оагӀонца къахьегараш.
Шоай къамаьла юкъе Москверча лораша геттара чӀоагӀа доаржадеш дийцар сурхаш, дегӀа маьженаш дӀалувцар (полиомиелит), чен, вувлавалар, кӀажъуха лазар, хьер, шод хьайоалача оъашта а нервашта а хула цамгар (паротит) яхача инфекционни лазарех. Берий дегӀа цар малагӀа тайпа зе ду, уж мишта дӀа-хьа доалаш да, мишта лоравала веза дийцар боккхача лораша.
«Кастта ишколе дӀачудолхаш да бераш, царна юкъе дукхагӀдараш маьхий тоханза да. Из боккха кхерам ба! Бакъда, берий даьй, ноаной из кхетаде безам болаш бац. Даьржача, цхьацца бакъдоацача къамаьлех тешаш, моллагӀа бахьан оттадаь а, бера маьхий ца тохийта хьож уж», - дийцар вай лораша.