Гимназерча технопарке берий аьттув хургба физикаца, химеца, биологеца, программированеца, робототехникаца ювзаенна кӀоаргаленаш йовза. Кхетам лакхбарал совгӀа, шоай проекташца болх бе йиш хургья цар.

Цул совгӀа, тайп-тайпарча яхьашка, олимпиадашка дакъа лоацаш, кийчо е аьттув лу технопарко. «Кванториуме» хӀара беро ший начӀал гучадоаккхаргда.

«Кхоана ураоттаргйолча вай тӀехьен керда, беркате никъ ба «Кванториум». Эшаш мел бола кхоачам болаш ба цига. Ӏилман проекташ йоаржае, шоай начӀал лакхде аьттув хургба дешархой. Керда кӀоаргаленаш йовзаш, вахаре пайда баргбар шаьрдеш, къахьегаргда цар», - дийцар дешареи Ӏилмани гӀулакхех йолча Министерствон хьалха латтача Цхьорой Ахьмад-Башира.