ГӀР къаман библиотеке гойтам хьабийллар, цӀихеза Ӏилманхо Цхьорой Марет яь ди долаш
Янданаькъан Жамалда цӀерагӀча Къаман библиотеке книжкай гойтам хьабийллар, цӀихеза Ӏилманхо Цхьорой Марет яь ди долаш, из я дуненна йовзаш йола Ӏилмай доктор, Сорбонна (Франци) дикагӀа лоархӀаш йолча университета профессор. Цун балхаша дика масал гойт Ӏилма довзара, иштта халкъашта юкъерча боараме гӀалгӀай культура йоаржаяра даькъе.
«Экспозицена чубоагӀаш ба Ӏилманхочун болх, из хетабаь ба Кавказа халкъий къаьнарча дина, мифологена, этнографена. Доазол арахьа яхаш, болх беш йолаш, Гӏойсолта Марета цӀаккха лаьгӏбаьбац ший мехкацара бувзам, из даим довза ловш хиннай Ӏилман-культуран, юкъарлон-политически вахара хоамаш.
Вай библиотекан ганзе цо совгӀата денна книжкаш да, уж го йиш я юбилей йолаш кийчбаьча гойтаме, - «Нохчий, гӀалгӀай, французий метташкара къаьнара дин тешалаш (Ӏилманхочун хьалхара монографи), «Тушоли - тӀеххьара Кавказа даьла-нана», «ГӏалгӀай пантеон», «Къаьнарча къамий дика мел дарий лараш, гӀалгӀай культуран а метта а юкъе», «Хурриташ, Гаргарейш, Кавказа ГӏалгӀай», цул совгӀа французий метталара балхаш», - аьлар библиотеке «Сердало» газетага.
Гойтамо таро лу наха Ӏилманхочун болх кӀоаргагӀа бовза, цун тохкама балхашта таржамаш даьд массехк меттала, цун лакха мах а оттабаьб дунен академически юкъарлоно.
