ГӀажарий-Юрта лоархӀаме кхетаче дӀайихьар
21.03.2025 11:04
Терроризмах, низ тӀалоаттабарах дувцаш кхетаче дӀайихьар ГӀажарий-Юртарча № 4 йолча ишколе Шолжа кхален администраце болхлоша. Из хоам «Сердалога» бир цу моттигера.
«Цу бӀехача гӀулакхо наха юкъе доаржадеча зуламах дийцар кхален администраце кулгалхочун гӀонча волча ЦӀечой Беслана, Новразанаькъан Тамерлана. Къаьстта терко тӀайохийташ дийцар интернета оагӀонашка гӀолла кагирхой тувлбе гӀерташ, цу юкъе чуозаш леладеча зуламах», - йоах хоамо.
ГӀалгӀай Ӏадатий ишкола кулгал деча Ӏалбаканаькъан Хаважа берашта хьалхадаьккхар эхь, эздел лорадеш лелар мел лоархӀаме да, иштта марха доастача деношка сабаре, фийла, иманах ца бохаш хила безилга.
