Кердача Реданте дӀайихьар Заьзганаькъан Идриса хетаяь кхетаче
Кердача Редантерча культуран ЦӏагӀа хилар «ГӏалгӀай къаман цӀихеза воӀ» яха дагалоаттама сахьат. Кхетаче хетаяь яр политически болхло хиннача, гӀалгӀай паччахьалкхе хьакхеллача Заьзганаькъан Бейсолта Идриса, из хилар «Дешархошта - культура» яхача Ерригроссийски болама чуйоагӀаш.
«Цӏихезача мехкахочун дагалоаттама кхетаче йолаш, гулбелар № 24 йолча юкъерча ишкола дешархой. Кхетаче дӀахьош хилара бахьан дар, кхувш йоагӀача тӀехьенна йовзийтар ГӏалгӀай автономи хьакхолларца ювзаенна цӀи. Из дӏахьош хиннача Хамхой Ӏашата берашта довзийтар Заьзганаькъан Идриса вахара истори. Цо дийцар цун атта боацача наькъах, цун политически къовсамах. Заьзганаькъан Идрис хӀара гӀалгӀачун дика вовзаш ва ший Даьхен гӀулакх лакха лоаттадаь саг хиларах тарра», - аьлар «Сердало» газетага из кхетаче вӀашагӀъеллараша.
Заьзганаькъан Идрис даим сий долаш, ший Даьхен мутӀахьа волаш хьавенарех ва. Из вувцача хана дагаух цун фусам-нана Ярача Жанетта. Паччахьа полковника йоӀ, дийша, лоӀам бола саг хиннача цо йийкъар ший цӏендаьца еррига вахара халонаш, цох болча дагалоаттама хетадир ший деррига вахар.
Из тема дикагӀа йовзаргйолаш дешархошта могадир патриота, кулгалхочун вахарах дувцаш дола книжка дешар. Из я «Чахкенаькъан Саӏида язъяь «Заьзганаькъан Идрис: тешамцеи бакъдолчунцеи» яха очерк, «Къаман дӀаденна вахар» яха Янданаькъан Ӏаддал-Ӏазиса болх, иштта «ГӏалгӀайче, гӀалгӀай» яха Янданаькъан Марема болх.
Заьзганаькъан Идриса балане валар- из бӀарчча бӀаьшерен белгало да. ГӏалгӀайчен дукха везаш вола, начӀал дола воӀ санна; из вахаргва кердача ноахалий дегашка.
