Дагалоаттама болама юкъе дакъа лоацаш хилар АПК болхлой
Дагалоаттама, сийлен Мемориале 1944-ча шера мехкахбаьхараш дагалаца гулбелар мехкарча юртбоахама гӏулакхех йолча министерствон болхлой. Из хоам «Сердалога» бe цу моттигера.
Къаман исторецарча узнарча деноех дийцар вай мехкадас Келаматанаькъан Махьмуд-ӏаьлас, боккхийча наха, къахьегама моттигашкарча тоабаша, дийшача наха, студенташа, ӏилманхоша. Хийрача, шийлача мехка вай даьша текха хало ювцаш бар берригаш.
«Гӏалгӏай къам, цхьаккха бехк боацаш, харцо тӏакхелла, са санна езача, хьамсарча Даьхенах даьккха; гаьнарча Казахстане ӏодахьийтара хетаяьча кхетаче дакъа лоацаш вар юртбоахама гӏулакхех йолча министерствон хьалха латта Гаьгенаькъан Мухьмад, шийца балхара тоаба йолаш», - йоах тхога бенача хоамо.
«Вай дегашта цӏаккха а дицлургдац из ди! Кхувш латтарашка массахана дӏадувца деза вай къаман истори довза, лархӏа дезилга, таханарча вахара хам беш къахьега дезилга», - белгалдир Гаьгенаькъан Мухьмада. 1944-ча шерарча шийлача саькура бетта бахачара бохабаьраш лаьттанца къахьегаш, дукха хьайбаш леладеш, шоай кулгашца шортта хӏама хьалкхедеш, бешамаш лелаеш хинна нах ба.
Массахана хӏама хьадеш болаш, нийсхон тӏехьа болаш, вӏаший къахетаме, бартаца баьха нах хиннаб йоккха харцо тӏакхелла хийрача мехка ӏобахьийтараш. Тахан вай массане доаккхал ду уж, яхь йолаш, деналца, майралца цу халонех чакхбаларах.
