«Безача хьаьший моттигаш дӀалаьцар Халкъа Гуллама кулгалхочун гӀончас Хьаьшанаькъан Азас, ГӀалгӀай Республикан промышленноста, бувзама министерствон хоамий кхерамзленна отдела кулгалхочо Хьоашаланаькъан Мухьмада, ГӀалгӀай Республикан кагирхой парламента спикера Ӏаспенаькъан Адама, Буро кӀалхарча №1 йолча ишкола кулгалхочун гӀончас Йовлой Мухьмада, Санкт-Петербургерча къамий ЦӀенна чуйоагӀача кагирхой совета кулгалхочо Оздой Рамзана. Ерригроссен къамашта юкъерча кагирхой цхьанкхетара моттигерча кулгалхочо Оздой Инала, ший гӀончаца ГӀамарзанаькъан Мухьмадаца цхьана дийцар, проект кхоачашъярах. Цунна чуйоагӀаш хургья лекцеш еша еза мехка 5 дешара моттиг. Гулбеннараша дийцар кибербуллинга хаттараш, ондаргашта юкъе во Iаткъаш дола хьалаш нийслургдоацаш, уж цар вахар кхерамеча хIамаех лорадарца дувзаденна да», - йоах хоамо кепайоазон гIирсага. «Вай Ӏомадала деза, нийса вахара никъ дӀахьош, даха. Бокъонаш лораераша беча балхал совгӀа, бокъонах йоаца интернета сайташ дӀаяхара, зуламхошца къовсам лоаттабара вай лакхбе беза кхувш боагӀарий сакхетам, из дӀабахьа беза ишколашка», - аьлар Хьаьшанаькъан Азас.