Парламенте йийцар 2025-2027 шерашка хургйола ГӏалгӀайчен бюджет
ГӏалгӀай Республикан Халкъа Гуллама йоалах, бюджетах йолча комитета кулгалхочо Дебаранаькъан Мухьмад-Сале даьча къамаьлага халкъа ладувгӀар хилар, цига дийцар хьатӀадоагӀача кхаь шера хургйолча мехка бюджета хьалах лаьца.
«Сердало» газетага Парламента зарбан болх лелабераша баьча хоамах, закона проект техкай, вахара-экономически дегӀаахара йола таронаш дӀа а лоархӀаш.
«Бюджетанна чубоагӀаш бола пайда юкъера дӀалаьрхӀача 27 368 807,9 сом да, юкъера дӀалаьрхӀача дӀадодаш дар - 27 744 964,6 эзар сом да, ца тоъаш дар-376 156,7 сом да.
Бюджета проект вӀашагӀъеллай, ГӏалгӀай Республикан паччахьалкхен Ӏаьдала болх хьаберий доакъой деррига хьашташ чулоацаш» - аьлар цу кхетаче мехка ахчан министра гӀончас Эсамарзанаькъан Мухьмад-Шарипа.
Цул совгӀа, гулбеннарашта довзийтар хьатӀадоагӀача кхаь шера ГӏалгӀайчен вахара-экономически дегӀаахара хьал а иштта тӀахьожама-лоархӀама палато баьча балха толамаш а. Мухьмад-Шарипа белгалдир, хоадам боллаш таьрахьаш дувцара йола ха кхы а хьалха я, хӀана аьлча федеральни бюджетага хьежжа, юха ца доалаш, хьакхоачашде дезар кхы а мелд ховш дац.
Цунга хьежжа доацаш, йоалах йолча комитета кулгалхочо аьлар, бюджет дукхагӀча даькъе вахара-экономически дегӀаахара дакъа теркалдеш я, иштта из лаьрхӀа я вахара даькъ тӀара хьалаш дика хилийтара.
Цох 70% дӀахьожадергда вахара хьалаш тоадара, цо хьагойт ГӏалгӀай мехка вахара политика керттера хилар.
