24 автобус хургья берий гӀулакха араяьккха. Сластенин Владимира тӀадиллар; берашта лаьрхӀа кхача дика хилийта, наькъашкара кхерамзлен хьал лакхача боараме дӀахьо, иштта салоӀача лагерешкарча санитарни хьала йоккха терко е, аьнна.

Берашта наькъашкара бокъонаш йовзийташ йола «Кхераме йоаца чарх» яха яхьаш дӀаяхьа лерхӀ Шолжа-Шахьаре, укх бетта 31-ча дийнахьа. Цу яхьашка котало яьккхараша гуйран шоллагӀча бетта Анапе дӀаяхьа лерхӀача ерригача Россе яхьашка гойтаргба вай мохк.

Укх шерарча хьалхарча биъ бетта 90 000 совгӀа кхоачамбоацар да ПДД дувзаденна. Царна юкъе да машин сиха лаллар, бокъо йоацача доазон тӀа дӀатӀавалар, светофора цӀе бос теркал ца беш дӀавахар.

Цу гӀулакха бола тӀахьожам кхы а чӀоагӀагӀа лакхбергболаш, керда 35 суртвидеотӀахьожама гӀирсаш оттаде лаьрхӀад мехка. Цар наькъашкара хьал тоадергда, хатараш а кӀезигагӀа хулийтаргда, Дала аьннадале.