Дола-Коа белгалдир ГӏалгӀайчен Конституце Ди
Хӏара шера саькура бетта 27-ча дийнахьа ГӏалгӀай мехко белгалду ший исторена лоархӀаме дола Ди. Нийсса 32 шу хьалха мехка тӀаийцар; паччахьалкхен машара, барта кӀийле чӀоагӀъяь йола Конституци - Керттера закон. Вай кхувш доагӀача ноахала из дикагӀа довзаргдолаш, культура Цӏен болхлоша «Вай - ГӏалгӀайчен халкъ: паргӀато, нийсхо, Даьхе» яха хоамий сахьат дӀадихьар.
«Кхетачен программа дика вӀашагӀъеллаяр. Цига дийца керттера дешаш дар: Конституци яхилга фуд, цунга кхачале малагӀа никъ дӀабихьар ГӏалгӀайчено. Кхетачен доакъашхой: боккхагӏбараш, бераш - дика кхетадеш бар малав Керттера закон хьакхоллаш лаьттар, иштта дийцар хӀара вахархочун бокъо чӀоагӀъеш долча каьхатах. Къаьстта терко тӀаяхийтар Герба, Байракха, Гимна, уж да республикан дезадараш»,- аьлар «Сердало» газетага Дола-Коарча культуран Цӏен кулгалхочо Алерой Билала.
Кхетачен лаьрххӀа йола сийрда оагӀув дӀахьош бар къонабараш. Цар Даьхе, Конституци хестаеш байташ йийшар. Иштта цига дӀайихьар, «Йовза хьай Конституци» яха викторина, цига шоай хьамсарча мехка истори довзаш хилара лакха боарам гойтар.
Цул совгӀа, «Вай дахаш дола закон» яхача книжкан гойтам кийчбаьбар юртарча библиотекан болхлошца цхьана.
