Дола-Коа дӀайихьар «Наркотикаш - из боанг я» яха кхетаче
МагӀалбика кхален Дола-Коарча культуран ЦӏагӀа хилар «Наркотикаш- из боанг я» яха хьехамаш ду кхетаче. Из лаьрхӀа яр кагирхошта юкъе наркотикаш йоаржаяр юхатохара, царех хьадоала зулам довзийтара. Керттера маӀан дар, цу унзарча хьалах кагирхой лорабар, уж цу бӀехача наькъ тӀа хургбоацаш, цох хьадоала зулам доккха хилар царна гойтар.
«Кхетаче дӀахьош гулбелар МагӀалбика кхален кулгалхочун гӀонча Гатенаькъан Ӏийса, Дола-Коарча администраце кулгалхо Узиевгӏар Асхьаб, депутаташ Доврбиканаькъан Мурад, Солтакъанаькъан Бек-хан. Кхетаче дӀахьош, юртарча кагирхошта цох бола хоам ма барра бовзийтар, наркотикаш лелаярах тӀехьагӀа хьадоала зулам дийцар, дезала а юкъарлон а цо малагӀа зе ду хьалхадаьккхар. Къаьстта терко тӀаяхийтар цу ийрчача гӀулакха духьалъотталуш хилара. Кхетачен доакъашхошта дайзар наркотикаш лелаярах уголовни бехктокхаме оттавеш хилар», - аьлар «Сердало» газетага Дола-Коарча культуран Цӏен кулгалхочо Алероевгӏар Билала.
Кхетаче чакхъяьлар хьехам бу фильм гойташ. Наркоманех зулам даьнна моттигаш гойтаро къаьгга белгалйир сага вахара унзара йола оагӀонаш.
Наркомане хьал юхатохара хьехамаш каст-каста де деза, аьнна, белгалдир гулбеннараша. Цхьана вай хиларо мара, вай кагирхой цу воча хьалах лорабе таро лургьяц, хургдолча ноахала могашал лорае еза дерригаш а оарцагӀдаьнна.
