Гӏалгӏайчен юрташка хьалъергья, йиъ таханарча заман ишкол
2026 шера республикан юрташка хьалъе йолаергья таханарча заман йиъ ишкол. Проект хьаллаьцар РФ Федераце Совета Председатела Матвиенко Валентинас.
Ишколаш хьалъергья Пхьилекъонгий-Юрта, Гӏажарий-Юрта, Галашка, Кердача Реданте. Уж гӏишлош чуйоагӏаш яцар хьалхарча федеральни плана. Бакъда, Гӏалгӏайчен Кулгалхочо Келаматанаькъан Махьмуд-ӏаьлас ма аллара, республикан Паччахьалкхено дика болх дӏабахьарах, иштта Федераце Советаца бувзам хиларах, уж юкъеера цу программанна.
«Кхерамзле, иштта дикал йола дешар вай берашта ӏалашдар керттера декхар да. Тхона карагӏдаьлар уж ишколаш федеральни программанна юкъеяхьа, хӏана аьлча кхетаду: бераш дешаш хила деза таханарча сийрдача гӏишлон чу, массадолча хьалашца уж хургйолаш», - аьлар мехка Кулгахочо.
Гӏалгӏай Республикан Кулгалхочун, Паччахьалкхен зарбан болх лелабераша яхачох, юкъара дӏадодаш дар да 2,5 млрд сом, цох дукхагӏа дола дакъа лургда федеральни бюджето.
Белгалду, цу ишколай хьал дикагӏа хила дезаш дар.
Масала, Пхьилекъонгий-Юртара №1 йола ишкол хьалъяьй 70 шу хьалха, дукха ха я цунна низ тӏалатта - проектах хила дезачул шозза дукхагӏа да цу ишколе дешаш дола бераш. Цул совгӏа, таханарча дено дӏаехаш йолча кхерамзленна жоп луш а яц из ишкол.
Кастлуш Гӏалгӏайчен, Россе дешара Министерствошта юкъе бартчӏоагӏам бергба, ахча хьахьожадара хьакъехьа.
