Заьзгакъонгий-Юртара Центральни оала урам тоабир болхлоша
Центральни оала урам тоабеш бола болх чакхбаьлар Заьзгакъонгий-Юрта укх деношка. Эггара хьалхарча оагӀонца тоае еза моттигаш къоастаеш дӀакхухьача хоржамашта юкъе нийсбелар из урам 2024-ча шера. Укх шерарча бекарга бетта дӀаболабир болх.
Къаьстта из урам тоабар чӀоагӀа лоархӀаме дар бахархошта, хӀана аьлча берий беша, ишкола, амбулаторена, ФОКа тӀабодаш ба из никъ. Бахархой дуккхаза леткъабар; цига асфальт бац, лампаш йоацаш, баьде хул, яхаш.
«Цхьан километрага кхоачаш бола никъ хозача куца тӀа боалабир. Лампаш егӀа, керда тока оагӀув чуйилла, тоадир урама хьал», - белгалдир вай Мехкадас Келаматанаькъан Махьмуд-Ӏаьлас.
Къаман проектага гӀолла, хӀанз из 16-гӀа урам меттабоалабаьб МагӀалбика кхален доазон тӀа. Укх шера дӀадихьача хоржамашта юкъе котбаьлар Лохерча Ачалкхера Кооперативни оала урам. Вежарий-Юртарча Братски оалача урамал 4 эзар совгӀа сага дукхагӀа хоржам беш, лакхедаьлар цун гӀулакх. ТӀадоагӀача шера асфальт Ӏобилла, лампаш егӀа тоабергба урам, Даьла къахетамца.
