Къамаьл деш мехка кулгалхочо белгалдир керда дарбанче хьаеллар лоархӀаме долга, из республикан унахцӀенон даькъ тӀа дика хьалаш хилийтара боаккхаш бола цхьаькха а гӀа болга.

«Вайх хӀаране хьегаш дола къа, воай мехкахой вахар тоадара лаьрхӀа да. Цудухьа баркал ала лов сона гӀишлонхошта, ер керда лорий моттиг цар дика хьалъярах. Цу чу я процедураш ю, фельдшера, акушера кабинеташ, иштта я, цига Ӏо а вижа ший могашал тоае йиш йола палаташ, узи йоаккха гӀирс, бахархошта хьалхарча аргӀагӀа дарба дара эшаш мел дар укхаза долаш да», - аьлар цо.

Мехка Кулгалхо ше хьежар, эшаш мел долча лорий хьалашца Ӏалашо яьча кердача гӀишлонга. Цига иштта вӀаштӀехьдаьхад цӀи ялара духьалара, фо чукхетийтара, бӀеха хиш дӀаухаш хургдола балхаш. Инфекционни лазараш дӀа-юха даржаргдоацаш, могашал яйна нах къаьсттача моттиге гӀолла чакхбоалаш хургба.

Мехка зарбан болх лелабераша беча хоамах, «УнахцӀено» яхача къаман проекта чуйоагӀаш хьалъяьй ФАП, цхьан дийнахьа цига тӀаэца таро я 20 саг, цу юрта беррига бахархой ба 1 100 саг гаргга.