Мехкара ишколаш, берий бешамаш тоаеш бола болх йистебоалаш латт
95%-га кхоачаш баь баьннаб мехкара ишколаш, берий бешамаш тоаеш бола болх. Из хоам «Сердалога» бир мехкадаь зарбан болх лелабераша.
Яндарера №3 йола, Аршты яхача лоаман юртара, Эбарга-Юртара №2 йола ишколаш тоаяь яьннай. Кхыйолча моттигашкара болх а чакхбаьнна бала боалл.
Наьсарера №10 йола берий беш 90%-га кхоачаш кийча я. Карарча хана спортзалера, кхача кийчбеча моттигера балхаш ду.
Наьсарерча №9 йолча ишколера болх 85%-га кхоачаш баьннаб. Карарча хана токаца, кхерамзлен хьалаца дувзаденнараш меттадоаладеш боахк цига.
Болх дӀахьош латт Долакха-Юртарча СОШ-ДС №2, иштта Наьсарера, Илдарха-ГӀалий тӀара берий бешамаш тоаеш латт. Наьсарера №5 йола берий беш зӀамига хьаьший тӀаэца кийча я.
Вай мехкадас Келаматанаькъан Махьмуд-Ӏаьлас белгалдир, дешара моттигаш тоаеш бола болх мехка хӀара шера дикка тоалуш латтилга.
«Болх боаггӀача боараме дӀахьош хиларах, дикка гаьнадаьннад вай, дешара шу долалуча дийнахьа еррига моттигаш кийча хургья дешархой тӀаэца. Кердача куца тӀа йоалаяь, хоза тоаяь латтача ишколашка, берий бешамашка дӀахьош йола ха берий дегашта тоам беш хургья аьнна хет», - белгалдир вай Мехкадас.
ТӀадоагӀача шера дӀаболабе лерхӀ МагӀалбикера гимнази, йиъ берий беш тоаеш бола боккха болх.
