«ГӀалгӀай Республикан ЖӀайрахьа кхален ишколе «Турпалхочун Парта» яха лоархӀаме кхетаче дӀайихьар. Из хетаяь яр анзора, Сийлахь-боккхача Даьймехка тӀема доакъашхочунна, ГӀалгӀайчен сийдолча воӀа Пхьиленаькъан Лорса Саварбика. Цу дикача кхетачене дакъа лоацаш хилар кхерамзлен балха ветеранаш, анзорий урхаллен болхлой, «Анзорий къона доттагӀий», - йоах хоамо.

Саварбик хилар Сийлахь-боккхача Даьймехка тӀем тӀа дакъа лоацаш, из дӀаболабелча денз йистебаллалца. Из хилар анзорий эскара бӀухой чубоагӀаш, вӀашагӀтехача даькъ тӀа.

МоастагӀчоа духьалъотташ, денал гойташ, ше майра командир хилар хьахайтар цо дукхаза. Хийла чов яь а хилар, бакъда ше дикагӀа хилча, юха тӀема мугӀарашка воалар из. Цун тӀема никъ дукхача паччахьалкхен совгӀаташца белгалбаьб: ЦӀеча Байракха шин орденца, 1-гӀа дозал долча Даьхен тӀема орденца, «ТӀем тӀа карагӀдаьнначох» йолча майдилгаца.

Тахан ТӀаргиме латтача ГӀалгӀай Республике гӀолла йолча Россе ФСБ Анзорий урхаллено Лорса Саварбика цӀи лелаю.

«Турпалхочун парта» хьадийллачул тӀехьагӀа, ишколе дӀайихьар «Анзорий къонача доттагӀаша» дакъа лоацаш йола сийрда кхетаче.

Дешархоша аьлар, доаккхал а деш, из сийдола цӀи лелае, Россе гражданаш, Даьхен къонгаш хила шоаш кийча ба, аьнна.

Ишколе хьакхелла «Анзорий къона доттагӀий» яхача отряда кулгал деш я ГӀалгӀай Республике гӀолла йола Россе ФСБ Анзорий урхалле. Цу болама чудоагӀаш да, тайп-тайпарча ишколашкара 160 бер, царех 60 бер республикан ЖӀайрахьа кхалера да.