«Керттера дийца дош дар, Магас-Шахьара наькъашка; наджгоанцхой бетта 1-ча дийнахьа денз, 2024 шера ардара бетта 1-ча денга кхаччалца; авареш яра хьал, цун керттера бахьанаш»,- аьлар хоамо.

Магас-Шахьаре гӀолла волча ОГИБДД кулгалхочун гӀончас МутаӀаланаькъан М. дийцар; 2024 шера наджгоанцхой бетта 1-ча дийнахьа денз, тов бетта 20-ча денга кхаччалца йолча хана; новкъа хатараш хилара хьал. Шахьара говзанчашта хьалхашка декхар оттадир, ГАИ болхлошца цхьана наькъа хьалашка хьажарца дувзаденна. Цига тахка дезар да, кхоачам болаш светофораш йий, наькъашка увттаю гӀармаш тоъаш йий, наькъаш тӀа басарашца яь белгалонаш миштай, кхыдола гӀашлошта наькъал сехьабалара дола хьалаш кхоачам болаш дий.

Цул совгӀа, кхелахоша хьоахадир Н.Хрущева урам тӀа, Чахкенаькъан СаӀида урамгара Заьзганаькъан И. проспектага кхаччалца, цхьан оагӀорахьа машинаш лелаш хургбола никъ Ӏобиллар.

Цхьаькха де дезарех лаьрхӀа кертахдаьккха дош дар, ГӏалгӀай Республикан керттерча вуза даькъ тӀа гӀашлошта дехьабалара йола моттиг хилийтар.

Шахьара бахархой хьашташ кхоачашдеш, Магаса мэра Орцханаькъан Зайта тахка оттадир тӀехьара тӀа остановкаш хьаярах дола дош, иштта «Дель Магас» (КадыровгӀар цӀерах йола аллея) даькъ тӀа карт хьае е гонахьа гӀайна кхера оттабе беза аьлар, цу баь тӀа машинаш хьатӀайоахаш, сакхетам боацача наха из моттиг толхаергйоацаш.

Цар иштта лаьрхӀар, кхувш боагӀарий гӀулакхах, цар бокъонаш лораярах болча кхелахой болх чӀоагӀбе. Иштта белгалдир, дагадоаца зуламаш нийслургдоацаш, даим болх дӀахьош, из дика вӀашагӀболлаш хила безилга.