Шолжа-Шахьарерча паркий куц эргадаргда
2024-ча шера дIакъайла хиннача шахьарерча керттерча парка моттигаш меттайоалаеш боахк тахан. Цига ваха хиннача мехкадас Келаматанаькъан Махьмуд-Iаьлас теркалдаь кхоачамбоацараш бахьан долаш, дIакъайлар парк цу хана.
Парка моттигаш, цигара хьал боаггIача боараме цахилар, цул совгIа, кхерамзлен оагIонца дувзаденнараш а лертIа доацилга белгалдир республикан кулгалхочо цу хана. Парк меттайолаяра тIехьа кердача инвестора оттаяьча проектага хьожаш я тахан мэри. Бахархой паргIатта, цхьаккха кхерам боацаш салаIа йиш хургйолаш деррига тоадаь, керда аттракционаш оттаяь, къахьега лерхI цига.
Укх бетта мэре болхлоша дикка тохкаргда проекта чудоагIараш, дIахохьоргболча балха йист йоаккхаргья. Деррига каьхаташ кийча долча хана, дIаболабергба болх.
«Шахьара куц тоадара тIехьа лоархIаме болх ба из. Тоаеш латт тахан «Дагалоаттама, сийлен парка» моттигаш а. Шолжа-Шахьаре бахача 60 эзар совгIа болча бахархой дог хьоасташ, уж салаIа уха моттигаш хургья царех кастта», - белгалдир Мехкадас. Хьадувцачох, 2026-ча шера ахкан хана, хьаелларгья тоаяьча паркаша шоай наIараш.
