«Кхетаче дийцар кхерамзлен керттерча дешаех, вахара чӀоагӀо хила езарах, воча наькъах кагирхой лорабарах. Кагирхой харцахьарча наькъ тӀа баха гӀерташ, царна кхерам тӀатувсаш леладеча ийрчача гӀулакхех, уж цу тапарча наькъ тӀа баргбоацаш, царца даим болх дӀабахьа безарах дийцар», - йоах хоамо.

Йоккха терко тӀаяхийтар къамашта юкъерча гӀулакхий лерхӀама, иштта дин викалаша царца бе безача балха. Цига керттердар - цхьоагӀо, бокъонаш лораеш хилар, юкъарлонца шоайла гӀулакхаш леладеш хилар. Из хоам газетага бир кхетачен доакъашхоша.

«Таханара кхетаче вай кагирхой сакхетам лакхбара бола лоархӀаме гӀа ба, юкъарча кхерамзленна из эшаш ба. Цхьана мара вай аьттув баргбац зуламашта духьалъовтта, воайла лерхӀам болаш, вӀаший дезаш хила деза вай», - аьлар шахьара кулгалхочо Ӏумаранаькъан Аслана, цу хьала мах беш.

Полице болхлоша шоашта бакъахьа хетар хьалхадаьккхар, мишта юхатоха беза вай кагирхой, цу харцахьарча наькъ тӀа баргбоацаш, интернете гӀолла зуламе бувзам лелабарца къовсам лоаттабе беза, яхача хаттарашта жоп делар. Дин викалаша хьалхадаьккхар, дина хьакъехьа тахан лархӀа дезараш малагӀаш да, кагирхой шоай ханнахьа царех кхетаргболаш, царна малагӀа никъ хьеха беза дин дийшача наха.