Шолже хьехархочун Ди белгалдир
Шолжерча культуран ЦӏагӀа цӀай дӀадихьар, хьехархочун Денна хетадаь. Цига гулбелар бӀаьш совгӀа хьехархой, Ӏаьдала, юкъарлон викалаш, дешархой. Кхетаче дакъа лоацаш хилар ГӏалгӀайчен кулгалхо Келаматанаькъан Махьмуд-Ӏаьла, цо даькъалабийцар беррига хьехархой профессиональни цӀайца.
«Ер ди хоза да - дика таро я шуга дӀайха дешаш ала: баркал шоана, шун къахьегамах, сатемах, сийрдача кхетамах, оаш хӀара денна берашта луча. Оаш тахан кхебераш ба, вай республикан а берригача мехка а хургдар кхоана лорадергдараш», - аьлар Мехкадас, ше хьехархой даькъалабувцаш.
Цо белгалдир, дешар дегӀадоаладар Ӏаьдала керттерча декхарех цаӀ долга. Тӏехьарча шерашка ГӏалгӀайче 48 керда ишкол хьалъяьй, иштта 50 берий беш, тоаяь яьннай итташ берий бешамаш, кхыйола дешара моттигаш. Цо иштта дийцар «Профессионалитет» яха федеральни программа кхоачашъярах, ГӏалгӀай политехнически колледж хьаелларах таханарча заман дешара кӏийлен тӏа.
Цул совгӀа, мехка Кулгалхочо белгалдир лакха говзал йола болхлой кхебара даькъе хьехархочун болх лоархӀаме хилар.
«Карарча шера республике 257 сага дошо майдилгаш яьхар - уж я дӀадахача шера хинначул 50 дукхагӀа.
Из шун къахьегам ба», - аьлар Макшарипа Махьмуд-ӏаьлас.
Чакхъяьлар республикан дикагӀа болча хьехархошта совгӀаташ далара оагӀув. Сийлен грамоташ елар говзал лакха йолча а къонача а хьехархошта. Цӏай дӀаходихьар концерта программаца, из кийчъяьяр дешархоша, иштта республикан кхоллама тоабашца.
