ГӏалгӀайчен Шолже хьадийллар Россе Турпалхой сийлен улгаш
ГӏалгӀайчен Шолже, оагӀой бетта 9-ча дийнахьа Россе турпалхошта - цу шахьара бахархошта хетадаь сийлен улгаш хьаделла лаьрхӀар, яхаш, дийцар «Сердало» газетага ГӏалгӀай Республикан Паччахьалкхен архивни гӀулакха болхлоша.
«Мемориала улгаш кийчдаьд Российски тӀема- исторически юкъарлоно, ГӏалгӀай юкъарлон отделене дехарах.
Сийлен улгаш хетадаь да полковника, Сийлахь-боккхача Даьймехка тӀема доакъашхочоа,Советски Союза Турпал яха лакха цӀи еннача Иван Степанович Харлановна(1908-1972); гварде сержанта,Сийлахь-боккхача Даьймехка тӀема доакъашхочоа, Советски Союза Турпал яха лакха цӀи еннача Иван Иванович Виноградовна(1922 - 1963); Россе ФСБ центральни аппарата подполковника, Россе Турпал яха (венначул тӀехьагӀа) цӀи еннача Келаматанаькъан Макшарипа Ӏалихана(1969 - 2007); полице майора, Россе Турпал цӀи еннача Къоастой Абабукара; Россе Герзашцарча низий полковника, Россе Турпал яха цӀи лелаеча Хьоашаланаькъан Ювсапа Султана, - аьлар хоамо.
ЛоархӀамеча кхетаченах цаӀ я из, Россе Турпалхой, Даьхен лорбой сийна хетадаь исторически дагалоаттама цхьа дакъа да. Цу тайпарча кхетачено таро лу вай тӀехье дика масала гойташ кхее, вай къаман дикагӀа болча викалаша даьха толамаш гойта, цу турпалхой сий деш, уж хьалкхаба.
ЛаьрххӀа йола кхетаче дӀахьош, дакъа лоацаш хилар, ГӏалгӀай Республикан Ӏаьдала болхлой, ГӏалгӀай Республикан шахьарий, юртий бахархой, студенташ, дешархой.
