Шолжа-Шахьаре шерра дездир Коталон ди
Сийлахь-боккхача Даьймехка Коталон 81 шу дизар дезде арабаьлар Шолжа-Шахьаре. Вай мехкадас Келаматанаькъан Махьмуд-ӏаьлас дакъа лаьцар цига. Доккхача цӏайца республикан бахархой даькъалабийцар цо, хьалхадаьккхар, бӏехача нигатаца чугӏерта моастагӏа, лира тохаш, вай лаьтташкара аравоаккхаш лаьттарий сий де дезилга, из истори дицде йиш йоацилга, иштта таханарча тӏема операцена юкъе дакъа лоацаш болча вай бӏухой оагӏув хьаллоацаш къамаьл дир цо.
«Даьхенцарча безамах дувцаш дола Коталон хетадаь иллеш дар программан юкъе. Паччахьалкхен филармоне артисташ, иштта мехкара кхоллама оагӏонцара тоабаш яр сцена тӏа. Турпалал гойташ, фашиста духьаллаьтта Даьхен сийдола къонгаш дагалоацаш, царна баркал кхайкадеш бар гулбеннараш», - дийцар «Сердалога» цу оагӏонцарча министерстве.
Коталон Цӏай дездеча доазон тӏа дӏайихьар мехкарча пхьарий, цхьацца говзанчий балхаш гойта ярмарка, иштта тематически исбахьален экспозици. Берий кхоллама ишколера тайп-тайпара балхаш довза аьттув хилар гулбеннарий. Шоай сурташка гӏолла, Даьхенцара безам бовзийташ дар бераш цу дийнахьа.
