Ишколаш хьалъяьй «Дешар» яхача къаман проекта чуйоагӀаш, эшаш мел долча хьалашца Ӏалашъяьй. Укхаза дешархой таро я робототехника йовза, цунца болх бе Ӏомабала, кхача кийчбара гӀулакх Ӏомаде, дахчан, аьшка балхаш де, барзкъа тега, кхыдола хьалаш довза а уж карадерзаде а. Цул совгӀа, психолога кабинет я укхаза болх беш, берий таро я паргӀатдала, низ меттаоттабе.

«Кердача дешара моттигаша, шин сменах бераш дешаш хургдоацаш, из дош къоастаде новкъостал ду. Хьа тӀадоагӀача кердача шера бераш деша а, кружокашка а, спортивни секцешка а ухаш хургда укхаза», - аьлар, из гӀишло хьаеллаш, Келаматанаькъан Махьмуд-Ӏаьлас.

Мехка Кулгалхочо иштта тӀатехар, карарча хана дешара хьал тоалуш доагӀаш хилар: укх тӀехьарча шин кӀира бархӀ ишкол, цхьа берий беш хьайийллар вайцига.