Магӏалбикерча Денала урока юкъе дакъа лаьцар СВО ветерана Совтанаькъан Адама
Магӏалбикерча № 2 йолча ишколе дӏайихьача Денала урока юкъе дакъа лаца вийхар СВО ветеран вола Совтанаькъан Адам. «Сердалога» из хоам бир цу моттигера.
«Украинерча тӏема операце вай бӏухоша шоай декхараш кхоачашдеш лоацача даькъах дийцар ветерана. Берий дукха хаттараш дар цунга. Тӏема аренашка нийсденнача хӏамашта юкъе эггара чӏоагӏагӏа ший дег чу дижарех дийцар Адама. «Даьхен лорабой» яхача ганза доакъашхо волча Коазой Хьамида, «Россе эпсараш» яхача моттигерча Ерригача Россе Юкъарча оагӏонна кулгал деча Галай Руслана кхувш латтарашта дийцар, Даьхен гӏулакха арабаьнна, лакха майрал, денал гойтача вай бӏухоех», - йоах тхога бенача хоамо.
«Иштта йола кхетаченаш къонача тӏехьен эшаш я шоай къаман турпалаш бовза, цар цӏераш лархӏа. Даьхенцара безам цар дегашка чӏоагӏбар вайна тӏалатташ декхар да», - аьлар Галай Руслана.
