Мехкара вице-премьер Мутаӏаланаькъан Хьажбикар бахархой тӏаийбеш хилар
Унахцӏенон, гӏо лоаттадара оагӏонца дувзаденнараш доашхаш; бахархой тӏаийбу ди дӏадихьар вице-премьер волча Мутаӏаланаькъан Хьажбикара. Шоашта мел къувларех дувца аьттув бар наьха.
Тайп-тайпара дар хьатӏаихарашта къувлараш. Масала, Илдарха-Гӏалий тӏара Доврбиканаькъан Аза бойла йисача ший виӏий йиӏига фусам ӏалашъе гӏо дехаш яр. Дешареи ӏилмани гӏулакхех йолча Министерствонна тӏадиллар хьакима из гӏулакх тахка, ше яхача моттиге, е уж раьза бале кхычахьа квартира хургйолаш къахьега, аьнна.
Инаркъерча дукхача дезала нана йолча Кхоартой Аьсета дийхар; «Нана-турпал» яха цӏи хьаэцаш новкъостал де, аьнна. Цу гӏулакха эшаш дола каьхаташ мишта кийчде деза, эггара хьалха сенгара дӏаволавала веза хьалхадаьккхар цуннна.
Иштта, дарба де арахьа дӏабаха, молхашца гӏо де шоашта яхаш бар бахархой. Цхьаккха сага хаттар ца доашхаш дусаргдац.
