Энергетикий министерствос яхачох, ер шу доладелча денз 112 оалача номер тӀа 56 хоам бенаб республикера. ДукхагӀбола нах латкъаш хиннаб ток цахилара (30), хий лакъара (25), цхьа хоам хиннаб газ дӀайоврах лаьца. Уж масалаш дар дукхагӀа кхетаче дийцараш а, дӀахо дӀайодача хана царех хӀара моттиге де дезараш белгалдаьхараш а.

Керттера дош дар Илдарха-ГӀалий тӀа хиннача кхоачабоацарашца дувзаденна. Цига тӀехьарча шин кӀира хатар да ала мегаргдолаш 15 моттиг хиннай, царех ахаш цӀенхаштта теркалъе езаш а я. Духхьал цхьан дийнахьа цу тайпара 6 моттиг нийсъенна хиннай цига. Керттера бахьан да 25-30 шу даьнна тишъенна турбаш. Эггара халагӀа йола моттиг я цу даькъе Шолжера Илдарха-ГӀалийга йолха 17 км дӀоахал дола турбаш; кхы тӀехьа ца тетташ, хувца езаш я уж.

ГӀулакх аттагӀчарех деце а, ЦаӀ волча оператора къахьегамхой болх беш ба дийнахьа-бус, нийсденна хатар ма хулла сихагӀа дӀадаккха гӀерташ.  Локъадаьча моттигашкара болх чакхбаллалца, машинашца хьатӀкхухьаш хургда хий.

ЖКХаца дувзаденнача дешаел совгӀа, кхетаче гулбеннарий теркам тӀаозаш дар наькъий кхерамзленца дувзаденна дешаш. Автодора министра тӀадиллад дукхагӀа кхераме йола моттигаш малагӀаш я хьожаш тохкам бар, цу юкъедоагӀаш да  ша хила тарлуш дола лоаман наькъаш,  уж вӀашагӀкхеташ йола моттигаш-жӀараш. Хатараш хургдоацаш, лоралуш хилара тӀахьийхар водителаш.

Иштта дувца оттадаьча дешашта юкъе дар тӀехьарча 3-5 шера газаца, токаца дувзаденна хьалаш мишта хиннад тахкар, нах бовш хинна моттигаш къаьстта а теркалъеш. Бокъо йоацаш коммунальни хьашташ кхоачашдеча гӀирсех хьахоттабеннараш гучабахара болх ба чӀоагӀбаь дӀахьош. ДӀахо дӀайодача хана, цу тайпара моттигаш цанийсъялийтар да цу балха керттера декхар.

Бахархошца цахаддаш ден-бус бувзам лоаттабергболаш я, цӀай долча деношка салоӀача юкъа, болх беш йола хьем боаца штаб. Наьха бокъо я, гӀо дехаш, 112 яхача номерах а диспетчерий номерех а телефон тоха.