Наха шоаш хьаду хӏамаш 65%-га кхоачаш айде лаьрхӏа ба мехка кулгалхой
2030-ча шера энергетически доацача цхьацца долча хӏамай арахьа дӏакхахьара боарам 65%-га кхоачаш айбе лаьрхӏа ба мехка. «Къамашта юкъера коопераци, хӏама арахьа дӏакхахьар» яхача къаман проектага гӏолла дӏабахьа лерхӏаш болх ба из.
Дӏадахача шера мехкара хӏама арахьа дӏакхахьара болх 2.0 оалача экспорта боарамца тоабир вайцига. Къамашта юкъерча базарашка шоай хӏама дохка оттаде безам болча мехкарча бизнесменашта, дика аьттув луш дар из гӏулакх.
Укх шера ший болх дӏахохьош я программа. 20 млн рузкъа да цу оагӏонца дар. Мехкадаь, Паччахьалкхен зарбан болх лелабераша белгалдечох, массайолча оагӏорахьара гӏо лоаттаду хӏама арахецарашта - къамашта юкъерча гойтамашка дакъа лоацаш, «Россе хьадаьд» яха сертификат хьаэца гӏо деш, иштта кхыдараш а. «Хӏама хьадеш барий оагӏув хьаллацар тахан лоархӏаме да.
Ер шу доладелча денз, 360 эзар доллар совгӏа мах бола хӏама арахьа дӏадахьийтад мехкара. Цо хьагойт, вай мехка хьаеш йола арахьа дӏаэцаш йолга», - яздир ший вахара оагӏонашка вай мехкадас Келаматанаькъан Махьмуд-Iаьлас.
Мехкарча агропромышленни сектора хӏама тоалуш латт тахан. Укх тӏехьарча пхе шера цу оагӏонцарча кхачан хьал бархӏаза дукхагӏа хулаш айденнад. Керттерчарех да хьоар, ялат, бежана дулх, устагӏан дулх, молаш дола хий.
