Магасе дӀахьоргба НАТО мехкашкара хьадаьхача тӀема гӀирсий гойтам
ТӀема операци дӀахьоча, Россе бӀухоша хьабаьккхача тӀема гӀирса гойтам дӀахьоргба Магасе. ХьатӀабоагӀача бетта 2-ча денгара 4-ча денга кхаччалца латтаргба къаман цхьанкхетара Ден хетабаь из гойтам. Ялх доазон тӀа дӀахьоргба ший болх гойтамо. Цига хьокха оттаергья 18 тайп-тайпара тӀема машин. Царна юкъе я «Бредли», «Мардер», CV90, М113, Cougar яха бронетранспортёраш, Roshel, «Варта» яха пхо чакхбоалаш йоаца машинаш, иштта кхыйола хӀамаш. ТӀема операцен доакъашхошца къамаьл де, царга моллагӀа хаттар дала аьттув хургба бахархой. Цул совгӀа, цига йоаржаергья салташа хӀама дуа моттиг, шоай лоӀаме тӀема декхараш кхоачашде баха ловраш хоржаш болх дӀахьоргба.
Из боккха гойтам хьабеллача дакъа лоацаш хургва вай Мехкада. Республикан кулгалхочун зарбан болх лелабераша белгалдечох, гойтаме дакъа лоацарашта оатто еш, укх бетта 31-ча денгара хьатӀабоагӀача бетта 4-ча денга кхаччалца, машинашта дӀакъовларгда Горчхананаькъан, Кулиева оала урамаш, Заьзганаькъан И. проспект.
ТӀема юкъе моастагӀашкара хьаяьхача хӀамай гойтам лоархӀаме гӀулакх да тахан. Росси бахархой дог ураоттадеш, мехка низ дӀахьокхаш, дӀахьош болх ба из.
