НАТОгара хьаяьккхача тӀема фесага, ах дийнахьа 6 эзар саг хьежар
Лайчилла бетта 2-ча дийнахьа, Магасе хьабийллар НАТО тӀема техника гойтам, из лаьрххӀа йола операци дӀахьош, ЮВО вай бӀухоша моастагӀчунгара хьаяьккха я. Хьалхарча ах дийнахьа хьежар 6 эзар саг: уж бар лаьрххӀача операце доакъашхой дезал, кадеташ, къона эскархой, студенташ, туристаш.
Гойтам хьабеллаш, цига дакъа лоацаш хилар СКФО гӀолла Россе Президента викала гӀонча Надыкто Владимир. ГӏалгӀайчен Паччахьалкхен доакъашхошца цхьана Надыкто хьежар «Низ бакъдолчун тӀехьа- доаккхал а котало а» яхача, российски салтий денал гойташ болча гойтамга. Цо белгалдир, цу тайпарча кхетаченаша наха юкъе Даьхенцара безам совбоаккхаш хилар.
Гойтама хьалхарча дийнахьа, низ бола, тӀема хьал довза тохкам бе моастагӀчун даькъ тӀа ухийташ йола дронаш яр цига го йиш йолаш. Говзанчаша дийцар уж мишта лелаю, тӀема даькъ тӀа цар малагӀа декхараш кхоачашду. Цул совгӀа хӀаравар хьажа йиш йолаш вар шийна фу могаргда, нагахьа санна оператора моттиге ше нийслойя.
ГӏалгӀайчен Кулгалхочо Келаматанаькъан Махьмуд-Ӏаьлас гойтамах лаьца аьлар:
«Белгалдаккха безам ба, укх тайпарча гойтамо кагирхой Даьхенцара безам совбоаккхаш хилар, иштта цо таро лу наха тӀема хьал дикагӀа довза.
Вай дицде йиш яц, хӀара вайна гуш йола техника - из вай бӀухошта карагӀдаьннар да, цар денал, турпалал, цар хьинар да.
Уж вай Россе Даьхе лораеш латт. Вай доаккхал ду царех, лакха мах болча вай бӀухоех», - аьлар Келаматанаькъан Махьмуд-Ӏаьлас.
Массайолча моттигашкара хьаух нах ГӏалгӀайче, из тамашийна гойтам бӀаргаго; къаьстта СВО доакъашхочо дувцаш дола, ма дарра тӀема хьал шоашта хазар духьа.
Гойтам дӀахьоргба лайчилла бетта 4-ча денга кхаччалца, цига хьажа йиш йолаш ва моллагӀа саг. Хӏара дийнахьа Ӏуйрийна 10 сахьат даьлча денз, сайрийна 18 сахьат даллалца хургба из.
