ГӏалгӀайчен вахархочунна зе хилар интернета тийшаболх бахьан долаш
ГӏалгӀайчен Наьсарен кхален бокъонаш лораерий органашка вера моттигера вахархо, интернет-оапишко зе даь вола. Из нийсделар, цу сага дика яьржача Telegram оагӏон администраторца бувзам лелабеш хиларах.
«Зе хиннача сага хоам бир, зуламхочунга ше Ӏехавайтарах, инвестицеш юкъейоахаргья аьнна ахча ше цунна дӀадахьийтарах. Боккха пайда баргхиларах Ӏехавенна, 50 эзар сом цу сага дӀадахьийтад, цо хьаденнача адресах. Ше ахча хьаийцачул тӀехьагӀа, зуламхо бувзаме ца воалаш дӏасецар. Тӏаккха зе хинначо кхетадир, ший бокъонаш лораерий органашка ваха везилга», - яхаш, дийцар «Сердало» газетага ГӏалгӀайчен чурча гӀулакхий Министерствос.
Наьсарен кхале гӀолла йолча Россе ОМВД болхлоша из гӀулакх тохкаш да. Из Россе Уголовни кодексах «Наха юкъе зулам доаржадар» оала 159 статьяца доагӀаш а да.
ГӏалгӀайчен бокъонаш лораераша бахархой тӀахьех, фийла хилара, малаш ба ца ховча наха инвестицешта деза, е кхыча гӀулакха деза яхе а, царех тийша ахча дӀа ца кхахьийтара. Ха дезаш да, бокъонца йолча инвестицей компанеша аргдоацилга; сиха ахча хьадайта, аьнна; цул совгӀа мессенджерашка гӀолла уж бувзаме ца бувлилга.
