Экстремизм, терроризм яхача доккхача зуламашта духьалара кхетаче дӏайихьар Шолжа кхале
Терроризм, экстремизм яхача зуламашта духьала лоаттабе безача къовсамах дувцаш, кхетаченаш йоаржайир Шолжа кхален моттигашка. Из хоам «Сердалога» бир Шолжа кхален администраце хоамашцарча оагӏон кулгал деча Цӏечой Беслана.
«Гӏажарий-Юртарча культуран цӏагӏа хьахьокхаш хиннача кинога хьажа гулбелар пхе ишколера дешархой. Хӏаране дог тохадолийташ, кӏоаргга уйла яйташ дар терроризм яхача зуламах дувцаш хиннача кинос гойтараш. Шолжа кхалерча администраце кулгалхочун гӏонча волча Новразанаькъан Тамерлана берашта дийцар, цу унзарча хӏаман духьала массахана къовсам лоаттабеш, цох лоралуш хила дезилга», - йоах тхога бенача хоамо.
Галашкарча бераша шоай сурташца хьахьекхар, машаре, бартаца вахар мел хоза да. Эбарга-Юрта, Берда-Юрта иштта лекцеш дӏайихьар къонабарашца.
