Пхи шу даьнначул тIехьагIа говзал лакха йолча студента бокъо лу ханал хьалха диплом хьаэца, цунна кхувргдолаш СССР исбахьален Академе И. Е. Репина цIерагIча Ленинградски живописа, скульптура архитектора институте деша отта. Укхаза монумент оалача сурт дуллача отделене Поалонкой Мурат дунен халкъашта юкъе цIи хезача суртанча, профессора А. А. Мельникова дешархо хул.

Хьалхара лаьрххIа бола гойтам Махье Мурада дIабихьар 1981 шера Шолжа-гIалийтIа. Цу шера «Нохч-ГIалгIайчен цIи хеза исбахьален болхло» аьнна цIи елар цун.

1997 шера Мурада проектах вай къам мехкагIа даьккха хилара дагалоацама Мемориала комплекс хьалйир. Из бахьан долаш Мурада Россе суртанчий Академе дошо мейдалг елар. Цо баь болх ГIалгIайчен исторе, культура тIехьле, архитектура дагалоацам хинна дIаэттар. Иштта из РФ суртанчий реестра юкъе боалабир.

Поалонкой Мурад Россе халкъа суртанча, иштта Россе суртанчий академе сийдола доакъашхо ва. Цу тайпара цIи йолаш суртанча Къулбехьарча Кавказе дукха бац. Къулбехьарча —Кавказа вахаре исбахьален цо доккха дакъа юкъе дарах Россе суртанчий Союза дошо мейдалг енний цунна.

Ший хана искуствоведа Дахкильгова Лидас белгалдаьчча бесса Поалонкой Мурада даьча балхашка хьежача хоалуш хул лакха говзал йола суртанча из ва. Кхерий тIа, дахчах, моллагIча хIамах цунна сурт хьаде ховш хиларо цецвоакх. ЦаI шоллагIчоа тара доацаш, ший тайпара суртанчий оамалца мара ховрдоаца сурт Iодуж цун кулгашца.

Ше болх беча юкъа Мурада дукха сийрда сурташ дийхкад, цу юкъе декоративно-прикладной исбахьален сурташ а долаш. ЛаьрххIа бола гойтам дIабихьаб ерригача къулбехьарча-кавказе гIолла, Москве, Санкт- Петербурге, дукхача Россе шахьарашка, Россе доазол арахьарча мехкашка. Цун балхаш дерригача дунен тIарча музеяшка, доалахьарча коллекцешка да.