Мехкара 32 дов дIадоаккхаш, къахьийгар Мехкадас тIахьожам лоаттабеш болх дIахьоча комиссе
2025-ча шера денз, наха юкъера 32 дов дIадоаккхаш къахьийгад цу оагIонцара болх дIабахьа оттаяьча комиссе. Из хоам «Сердалога» бир мехкадаь зарбан болх лелабераша.
Цхьацца бахьанашта тIагIолла вIаший ийгIараш тоабе гIерташ, дIабихьар боккха болх ба. Царна юкъера ялх моттиг пхьа хьаьрча яр. Къаьстта лоархIаме дар дукха хана денз Дебаранаькъан, Мамилганаькъан, ГIоандалой, Доврбиканаькъан тайпашта юкъе лаьтта довнаш дIадахар.
Иштта, наькъашка хиннача хатарашта тIагIолла хьахинна бархI дов а дIадаккха аьттув баьлар, Даьла къахетамца, иштта цхьацца бахьанашца юкъеденна 18 тайпара цатоамаш дIадаьлар.
Вай мехкадас Келаматанаькъан Махьмуд-Iаьлас белгалдир комиссе тахан дIахьор лоархIаме болх болга. «Iаьдала болхлоша бехкебараш бокъонца бехктокхаме оттабеш болх дIакхухь, хIаьта дукха гаргалонаш, вовзар-везар юкъелаттача вайна юкъе цхьацца бахьанашта тIагIолла довнаш эттача, бIарччача дезалашта, тайпашта йоккха хало йолаш хул из», - белгалдир ший къамаьла юкъе Мехкадас.
