Вай лоамашка ӏомалуш ба, берригача мехкара альпинисташ
Жӏайрахьа кхален «Кязи» яхача альпинистий лагере кийчон болх дӏахьош ва тахан Россера 100 совгӏа спортсмен, инструктораш, иштта кхыбараш а. Альпинистий гӏулакх дикка шаьрдеш, моттигерча ишколаша пайданедараш дӏа-хьа эцаш, халача моттигашка тӏабувлар хила деззача тайпара тоадеш, болх ба ала деза цох.
«Сердалога» бенача хоамах, спортсмений керда тоабаш тӏаийеш, хӏара денна болх дӏахьош ба цига. Кийчон программага гӏолла, де дезаш хиннараш кхоачашдаь баьннаб тахан Нижегородски областера, Гӏибухен-Малхбузен федеральни моттигера спортсменаш. Керда тоабаш тӏаэца кийчо еш ба цига хӏанз. Укх деношка кхача везаш ва «Кязе» Татрий мехкара 30 спортсмен.
Белгалде деза, Жӏайрахьа кхален моттигаш цу гӏулакха чӏоагӏа тайна, дика йолга. Хӏетта болалуш барашта, иштта лакха говзал йолча боккхача альпинисташта еззача тайпара я цигара моттигаш. Цунга хьежжа, геттара доккха начӏал дола альпинисташ а вайцига тӏалатташ ба.
Вай туризма лоархӏаме да из, хӏаьта лоамашкара туризм дега гарга йолча Россерча альпинисташта дикка аьттув ба. Вай республикера лоаман моттигаш берригача мехка дӏайовзийташ болх ба ала деза цох.
