МВД болх беш хиннача наха гӏо дир мехкарча цу оагӏонцарча ветераний кхело
Мехка чухьарча гӏулакхех болча оагӏон кхаь ветерана гӏо дир милице полковник волаш къахьегаш хиннача Котанаькъан Мухьмад-Сале кулгал деча республикерча Россе МВД ветераний оагӏоно. Дукхача шерашка МВД къахьийгача наха новкъостал деш, дӏахьош болх ба из. «Сердалога» из хоам кхаьчар МВД зарбан болх лелаберашкара.
Ветераний оагӏоно къаьстта терко лоаттаю тахан гӏо эшаш барашта. Шоай декхараш бехктокхаме кхоачашде хьожаш, мехках дог лазаш, болх дӏахьош хиннача наьха оагӏув хьаллацар лоархӏамеча декхарех да.
Ветераний оагӏон кулгалдеча Котанаькъан Мухьмад-Сале белгалдир, тахан цӏагӏа сайца болча боккхагӏа болча болхлой гӏулакхага хьожаш, терко лоаттаеш хилар МВД тхьовра денз хьадахьаш ӏадат долга.
Ветеранаша МВД исторе йоккха моттиг дӏалаьцай, эггара халача ханашка республиках дог лазаш къахьийга нах ба, цунга хьежжа царца гӏулакх леладеш, массахана бувзам болаш хила беза. Доккха баркал аьлар цар ветераний Оагӏон, хьалха латтача Котанаькъан Мухьмад-Салена шоаш биц ца беш хиларах.
Белгалде деза, из болх ветераний Оагӏонца лакха терко еш дӏакхухьаш болга.
