Балхацара хоамаш дӏа-юха доаржадаь полице болхло бехктокхаме озаргва
Хьалхагӏа МВД къахьегаш хиннача вахархочунна духьала РФ УК 3-ча даькъа 272.1. ст. гӏулакх хьадийллар Шолжа кхалерча Россе Тохкама Комитета Тохкама оагӏон болхлоша. Из тахан бехкеву компьютер чура сага вахарах бола хоам бокъо йоацача тайпара кхыча нахага кхачийтарах.
«Тохкамхоша белгалдечох, укх шера маьцхали бетта ший балха тӏа наькъашкарча кхерамзленах йолча Паччахьалкхен инспекце оагӏонца бувзам хиларах тарра, цхьан машина даь цӏерах бола хоам бокъо йоацаш интернете гӏолла кхыча сагага кхачийтаб цо, хӏаьта из хӏама де цхьаккха тайпара бокъо хиннаяц цун. «Сердалога» из хоам бера Тохкама Комитета болхлошкара».
Цу гӏулакхаца дувзаденнараш ма дарра тохкаш ба тахан ӏаьдала болхлой. Мехкарча МВД кхерамзлен оагӏонцарча хӏама гучадаккхара-тахкара оагӏон болхлоша гулдаьчун кӏийлен тӏа хьадийлла да из гӏулакх.
