Мехкада: Фецарча кемай болх дегӏабаро таро лу Татрий мехкацара бувзам шербе
Лайчилла бетта Магаса, Казана юкъера фецарча кемай рейсаш кӏира шозза хургья - шоатта, пӏаьраска деношка. Гӏалгӏайчен, Татрий мехка бахархошта из дика пайда луш да. Тӏехьара тӏа фецара кема цига дӏа-юха додаш хиларах атта а, сиха ваха а йиш хул. Иштта хьалаш хиларах, шин республикан чура туризма хьал а дегӏадоаладу, экономически бувзам, культура йоаржаю.
«Из болх иштта юкъе вӏашагӏболла таро хилар, Татрий мехка Президента Минниханов Рустама хьаллоацаш хиларах. Оаха из дош цунца хьалха а дийцадар. Цу тайпара из болх кердабаьлар ардара бетта 6-ча дийнахьа хиннача рейсах. Хӏанз фецарча кемаца баха ловраш совбоалаш хиларах, рейсаш а тӏакхийтар. Шин республикан бахархошта из дика таро я, каст-каста шоайла дӏа-юха бахара. Казань я Гӏалгӏайчен лоархӏаме гӏулакхаш леладара - дешара, культуран - центр а. Оаха бувзам лелабу цу даькъ тӏа меттел, дӏахо тхоайла а доттагӏал чӏоагӏдеш», - аьлар Гӏалгӏайчен кулгалхочо Келаматанаькъан Махьмуд-Ӏаьлас.
Цо баркал аьлар Татрий мехкарча ший новкъоста из гӏулакх кхоачашдеча цо иштта дика дакъа лацарах. Мехкада тешаш ва, дӏахо а вай мехкашта юкъера бувзам чӏоагӏлургхиларах.
