Бӏаьшерений юкъерча хана леладаь гӏагӏ
10.12.2025 14:24
Вай къаман исторенца, культуранца, ӏадаташца, оамалашца дувзаденна дукха тамашийна хӏамаш да. Дӏаяхача хана хиннача турпалий вахара никъ бовзийтараш кӏезига дац тахан, музейшка лорадеш дадаш.
Духхьал цхьан хӏаманга хьо хьажа, тахка эттача а ховш да, вай дай чӏоагӏа начӏал, говзал йолаш хиннилга, цар шоай кулгашца хьакхелла хӏамаш кӏоарга хьаькъал эшаш йолга. Малсаганаькъан Тухана цӏерах йолча музее уллаш долча, бӏаьшерений юкъерча хана хиннача тӏемахочун аьшках даьча гӏагӏо вайна хьагойт, цу хана баьха вай къаман нах чӏоагӏа кулгаговзал йолаш хиннилга. Бокъонца волча говзанчо хьаяь из аьшка коч чӏоагӏа тамашийна баь болх ба.
