«Ишколера классика» яхача проекте дехараш эггара дукхагӏа вай мехкара чуденнад
«Хьалхарчар болам - «Ишколера классика» яхача проекте эггара дукхагӏа дехараш вай мехкара чуденнад. Из хоам «Сердалога» бир мехкадаь зарбан болх лелабераша.
«Кагирхойи бераши» яха проект ишколера театральни оагӏонцара кхоллам хьаллоацаш; берий, кагирхой начӏал доаржадара тӏехьа юкъеяьккха я. Яхьашка дакъа лаца ловраш укх шера берригача мехка 30 эзар совгӏа саг ва. Вайцигара чуденна дехараш эггара дукхагӏа да. Москваца, Московски, Ростовски, Самарски областашца цхьан мугӏаре латт вай республика.
«Иззал дехараш чуденна хиларо хьагойт, вай кагирхой из хӏама дезаш, хьаллоацаш болга. Вай бераш-м начӏал, кхоллама оагӏонцара говзал йолаш да. Дега боккха тоам хул тайп-тайпарча яхьашка цар толам гуш», - белгалдир вай Мехкадас Келаматанаькъан Махьмуд-ӏаьлас.
Доккха баркал аьлар мехка Кулгалхочо къонабарашта гӏо деш, цу наькъ тӏа уж хьаллоацаш латтача хьехархошта.
