Мехкарча ЦУРа пхи шу дизар
Мехка доал деш йолча моттига 5 шу дизар тахан. ЦУРа кулгалдеча Банхай Беслана баркал оала каьхат дӏалуш, кхетаче дӏайихьар вай Мехкадас. Мехка кулгалхочо белгалдир, ЦУР хьакхоллар вай мехка вахаре лоархӏаме гӏа болга.
«Болх дӏахьоча юкъа 18 эзар совгӏа бахархошкара дехараш тохкаш къахьийгад ЦУРо. Цу оагӏонга гӏолла ЖКХ балхацара хатараш юстардоахаш, урамашка сердал хургйола хӏама деш, иштта кхыдола декхараш кхоачашдеш лаьттаб мехка», - аьлар Келаматанаькъан Махьмуд-ӏаьлас. Бахархой дехараш теркалдарал совгӏа, даржаш долча бакъдоацача хоамашта тӏахьожам лоаттабеш, наха нийсагӏдар дӏадовзийташ къахьег цар. Укх шера ЦУРа болхлоша ца баржийташ дӏабаьккхар бух боаца 19 хоам.
Шоай болх боаггӏача боараме цар дӏабахьарах, бахархой хьашташ теркалдеш хилара тӏехьа дикка белгала ба вай мохк тахан.
