ГӀалгӀай мехка ма хетта салоӀаргда Запорожьерча, Курскерча бераша
24.07.2025 09:33
Курски, Запорожски моттигашкара 100 совгӀа бер да вай мехка тахан салоӀаш. «Аьрзи» яхача лагере дӀанийсденнад уж.
«Сердалога» из хоам бир Мехкадаь, Паччахьалкхен Администрацена кулгал деча Мархенаькъан Анзора. Цох лаьца дийцар премьер-министр волча Сластенин Владимира кулгал деш дӀайихьача, хӀара кӀира хулача кхетаче.
Бераша ма хетта салоӀаргдолаш тӀахьажа оттабаь лаьрхӀа болхлой хургба. Сластенина тӀадилла, зӀамигача хьаьшашта декъаргда мерза совгӀаташ, ловзоргаш, иштта салаӀа эшаш йола кхыйола хӀамаш. Дешареи Ӏилмани гӀулакхех йолча министерствонна тӀадиллад; салаӀара эша программа вӀашагӀйолла, аьнна.
