«ДӀабихьача тохкама балхо хьахьекхачох, Наьсарерча, Илдарха-ГӀалий тӀарча Ӏамашкара, Шолжа чура, Эса чура хиш санитарни хьал лоха долаш да», — белгалдир Къамурзой Бориса. Наьсарерча, Илдарха-ГӀалий тӀарча Ӏамашка хоаденнад гельминташ, колифагаш, бактереш. Цул совгӀа, Шолжа чу, Илдарха-ГӀалий тӀарча Ӏам чу цхьа харцахьа хӀама чумессаяьлга гучадаьннад. Цу моттигашкарча администрацей болхлошта тӀадиллад, хи чу бӀеха, зене йола хӀамаш чутувсаргйоацаш тӀахьожам чӀоагӀбе, аьнна. Мехкадас техкар, цу моттигашкара лийца чкъаьрий даа йиш йий, аьнна. Роспотребнадзора кулгалхочо яхачох, унахцӀенон зе дергдоацача тайпара кийчбича, цу чура лаьцача чкъаьро зе дергдац; бакъда унахцӀенонна зе деш хургда цу моттигашкара хий, лувчаш воаллача хана кер чу доде. «Санитарни хьал цу хишка телха долга гуш да. Из цхьа тасса дита йиш йоацаш, вай массадараш оарцагӀдаьнна, тоаде дезаш гӀулакх да», — аьлар вай Мехкадас. Цу гӀулакха бехктокхаме болчарна тӀадиллар республикан кулгалхочо, хин тӀахьожам лоаттабе, санитарни хьал талхаргдоацараш лораде, хан-ханнахьа хин хьал тохкаш бола болх дӀакхахьа, аьнна.