Ткъо лор юрташка болх бе гIоргва карарча шера
ГIалгIайче дIахьош ба «Земски лор», «Земски фельдшер» яха мехка программаш кхоачашъяра болх, из дIаболабир 2012 - ча шера. Цу юкъа республикан юрташка болх бе волавеннав 384 лор, юкъерча лорий балха викал. Цох дийцар ГIалгIай Республикан Кулгалхочун, Паччахьалкхен зарбан болх лелабераша.
Цу гIулакхо таро лу цкъа луш дола ахча хьаэца - 1 млн сом лорашта, 500 эзар сом фельдшерашта. ДIадахача шера уж ахчаш хьаийцар 30 лора, карарча шера цу новкъа варгва 20 керда болхло. ХIанз укх сахьате 11 лора уж ахчаш дIаденнад, кхоъ каьхаташ гулдеш ва.
ГIалгIайчен кулгалхочо Келаматанаькъан Махьмуд-Iаьлас белгалдир керда болхлой юкъебоахаш хилар лоархIаме долга.
«Баркал ала лов дег чура вай мехка Президента Путин Владимира цо «Земски лор», «Земски фельдшер» яха программаш 2030 шерга кхаччалца йIаьхъярах. Цо таро лургья тхона кадрашца балха кIийле чIоагIъе, иштта хьалхашка латта декхараш кхоачашде», - аьлар Мехкадас.
Белгалду, уж программаш хиларах мехка таро хилар лорий урхалленашкара керттера хаттараш кхоачашде: ЖIайрахьа, Шолжа, МагIалбика кхален дарбанчешка, Наьсарен Б.Б. Бекботова цIерагIча ЦРБ, иштта кхычахьа.
