Телевидене гӏолла бахархошца хиннача кхетачене, СВО доакъашхой оагӏув хьаллацарах дийцар вай Мехкадас
Вай мехкадаьцара Келаматанаькъан Махьмуд-Ӏаьлацара эфире гӏолла хинна кхетаче тӏема операце бӏухой видеокъамаьлагара дӏайолалуш хилар. Тӏема аренашка латтача вай мехкахоша доккха баркал кхайкадир республикан кулгалхочунна, иштта бахархошта шоашта гӏо деш хиларах.
Мехкадас белгалдир, Даьхен гӏулакхе латтарашка, цар дезалашка хьажар тахан Россе Президента Путин Владимира къоастадаьча лоархӏамеча декхарех долга. Хьакимаша, Къаман фронто, юкъарча моттигаша, гӏо дераша, дешара моттигаша дакъа лоацаш вӏашагӏатохаш я тахан бӏухошта эшаш йола хӏамаш. «Даьхен лорабой» яхача ганза филиал я боккха болх дӏахьош, 2 007 сага массаза терко лоаттаеш. 2026-ча шера 4 727 дехар тӏаийцар цар, царна юкъерча 4 618-х (97,7%) болх чакхбаьккхаб. 261 сага психологически, психотерапевтически оагӏонцара гӏо даьд ганзага гӏолла. 158 ветеран лорашка чакхваьннав, 37 тахан дегӏа могашал меттаоттаеш ва, 42 бӏухо санаторе салаӏа вахийтав.
Цул совгӏа, 225 дезала 10 эзар сом ахча деннад, бӏухой 84 дезала ЖКХ оагӏонцара ахча 50% мара дала ца дезаш оатто яьй. Къаьстта терко лоаттаеш ба тахан мехка унахцӏенонца дувзаденнарашта.
Сурхо тӏара «Ветераний Цӏа» ший болх дикка тоабеш да. Кхоалагӏа корпус хьаеллар а гӏадвугаш хилар. СВО доакъашхой 138 саг хиннав цига салоӏаш. Бӏухой 780 гаргарча наха гӏо даьд лорашка чакхбала, эшаш йола молхаш ӏалашъе, иштта 13 сага эггара хьалхарча аргӏанца гӏо дергдолаш квоташ еннай.
Вай мехкарча берий бешамашка дӏачуийцад тӏемхой 879 бер, 49 бер - ишколашка. 104 студента лаьрхӏа гӏо деш хиннаб мехка, СВО бӏухой 1 620 бер берий лагерашка салаӏа дахийтар.
Иштта вай мехка йоаржаяь я «Шоллагӏа лакхале», «Фермерий Ишкол» яха программаш. Бӏухой цхьацца хӏама дӏадоладе аьттув ба царга гӏолла, хӏаьта «Турпала никъ» яхача болхлой программо паччахьалкхен, муниципальни моттигашка болх бе кийчбу уж.