ГӀалгӀай къаман
юкъара газет

Новости


Мехкада: Эса тӏара хий чулоаца моттиг экономически боарам лорабеш хьаю

Мехкада: Эса тӏара хий чулоаца моттиг экономически боарам лорабеш хьаю

Эса хий чулацарах, юрташка из дӏакхачийтарах, гӏишлон экологически кхерамзле лораярах дийцар Гӏалгӏайчен кулгалхочо Келаматанаькъан Махьмуд-ӏаьлас ше «Магас» НТРК нахаца бувзаме ваьннача хана, республикан бахархой хаттарашта жоп луш.

Республикан кулгалхочо белгалдир, из гӏишло ший тӏахьожам болаш хилар, бетта цкъа-шозза ше цига водаш хилар. Цо яхачох, цу проекта эшаш дола ахча ӏалашдаьд, болх йиллача хана чакхбаккха лерхӏ. Хьалхара юрташ из хий чудилла хургья 2027 шера, хӏаьта 2029 шера, цӏена, дикал йола хий хургда Гӏалгӏайчен дерригача даькъ тӏа.

Келаматанаькъан Махьмуд-ӏаьлас къаьстта терко тӏаяхийтар болхлой хаттарашта. Цу юкъе дакъа лоацаш долча боахамашта, из хьал леладеча предприятена тӏадиллад, хьалххе цу даькъ тӏа болх бе ховш бола говзанчаш кийчбар.

Экологически кхерамзленах, Эса хий лорадарах дувцаш, Келаматанаькъан Махьмуд-ӏаьлас белгалдир, еррига технически оагӏонаш чулоацаш, ӏалам лорадара боарам лорабеш проект кхоачашъеш хилар. Цунца цхьана цо тӏахьийхар бахархой, гонахьара моттиг лораяра, цо иштта белгалдир, бокъонах ца доагӏаш, берда йистера гаьнаш дӏатедаро лаьтта мелдеш хилар, из экологена ӏаткъаш хилар.

Эса хий чулацара хьалъеш йола гӏишло Гӏалгӏайче эггара йоккхагӏчарех я. Из юкъеяккхарах республике цахадаш дика хий лоаттаде таро хургья, хин турбашка дӏадодар а лаьгӏлургда.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде
Вверх