ГӀалгӀай къаман
юкъара газет

Новости


Келаматанаькъан Махьмуд-ӏаьлас аьлар, ПДД бокъонаш телхаераш юкъарлон кхелага бала беза

Келаматанаькъан Махьмуд-ӏаьлас аьлар, ПДД бокъонаш телхаераш юкъарлон кхелага бала беза

Къаманца къамаьл деш, Гӏалгӏайчен Кулгалхочо дийцача къамаьла юкъе керттера дар, вай наькъашкара хьал во латташ хилар. Из хаттар делар видеога гӏолла республикан вахархочо Балай Ислама.

Цу хаттара жоп луш, Келаматанаькъан Махьмуд-ӏаьлас белгалдир, наькъа хьовзамаш дукха хилар. Карарча шера наджгоанцхой беттагара ардара беттага кхоачаш, Гӏалгӏайчен наькъашка 181 наькъа-транспорта хатар нийсделар. Цу юкъе бовр нийсделар 42 сага, кхы а 247 сага човнаш хилар. Цига 27 ДТП берашца хилар, зӏамига диъ бер делар, 31 сага човнаш хилар.

Дукхагӏа авареш еш йола моттиг нийсъелар Магӏалбика кхале (44), иштта Наьсарен кхале, «Даькъасте» яхача федеральни наькъ тӏа (30). Цу хатарий керттера бахьан да машинаш сиха лехкаш хилар, цу бахьанах 53 хьовзам хилар, цига 18 саг велар. Иштта авареш дукха нийслуш хилара бахьан да ший йоаца наькъа оагӏув лацар, духьалйоагӏача машина наькъ тӏа валар. Цул совгӏа, республикан кулгалхочо теркалдир машинаш наха тӏаетташ йола моттигаш а дукха нийслуш хилар - ийс бетта 39 цу тайпара хьал нийсделар наькъ тӏа.

Республикан Кулгалхочо ше тешаш ва аьлар, духхьал паччахьалкхено таӏазар дарца из хаттар нийсде таро хургйоацилгах, нагахьа санна бахархоша шоаш цу юкъе дакъа лоацаш ца хилча. Цо иштта бехк баьккхар шоай зӏамига дезалхой машинаш тӏа хувшабеча даьх-наьнах. Мехкадас яхачох, 15 шу даьнна ондарг машина тӏа хоавича, цо наькъа кхерам тӏатосс, ше а шийна гонахьарбараш а унзарча хьалага кхоачабу, зулам хинна даьлча, гаргалонаш юкъеяха езаш яц, закона хьалхашка берригаш а цаӏаш ба.

Тӏеххьара ший къамаьл долаш, республикан кулгалхочо кхайкарал дир даьшка, ноаношка, дин викалашка, юкъарлон организацешка кхетам балара, хьалхадаккхара болх чӏоагӏбара уж тӏахьехаш. Цо аьлар, юкъарлоно юхатоха деза уж санна дола зуламаш, машинаш лелае бокъонаш йоаца нах вайна юкъе леларгбоацаш, цар маьршача наха зуламаш дергдоацаш, уж бехктокхаме оттабе беза.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде
Вверх