«Боккха перемена» яхача Ерригача Россе яхьашка белгалбаьлар вай мехкара студенташ
Ерригача Россе «Боккха перемена» яхача яхьашка дакъа лаца хержар Гаьгенаькъан Г. цӏерах йолча Къаман унахцӏенон колледжа студенташ.
«Сердалога» «Хьалхарбарий болам» яхача моттигера бенача хоамах, гаьнарча хьисапе болх дӏахьош дӏадоладелар хьалхара гӏа баккхар. Хьалхарча бӏале дикка белгалъяларах, дӏахо дакъа лаца йиш йолаш хилар вай мехкара тоаба. Ленинградски областе хиннача шоллагӏча бӏале дикача оагӏорахьа вай республика дӏайовзийташ, яхьий деррига декхараш тӏехдика кхоачашдеш, хьалхарбарашта юкъе эттар вай студенташ.
Мехка эггара толашагӏа йолча тоабаех хилар уж. Россе йоккхача, лоархӏамеча проекте вай къонабараш иштта белгалбалар доаккхал де дезаш, дега боккха тоам беш хӏама да ала деза. Дӏахо, коталонга бодача новкъа дикка къахьега дезаш ба уж, лакхерча лагӏа тӏа овтта.